വിഴിഞ്ഞം: മയക്കുമരുന്നായ മെത്താംഫെറ്റാമൈനും നൈട്രാസെപാം ഗുളികകളുമായി കോവളത്തെ ഹോട്ടലില് തങ്ങിയ മൂന്നു യുവാക്കള് അറസ്റ്റില്.
ഓള് സെയിന്റ്സ് മുസ് ലീം പള്ളിക്ക് സമീപം നിസാം മന്സിലില് അനസ് (23), തൊടുപുഴ കോടികുളം പൊട്ടോള വീട്ടില് ജിന്സണ് ജോസ് (28), പൂന്തുറ മാണിക്യവിളാകം ആസാദ് നഗറില് പുതുവല് പുരയിടത്തില് നിസാം(26) എന്നിവരെയാണ് കോവളം പൊലീസ് അറസ്റ്റു ചെയ്തത്.
ഇന്നലെ ഉച്ചയോടെയാണ് സംഭവം. ഇവരില് നിന്ന് അര ലക്ഷത്തോളം രൂപയുടെ മെത്താംഫെറ്റാമൈന് കണ്ടെടുത്തു. നൈട്രാസെപാം ഗുളികകളുടെ രണ്ട് സ്ട്രിപ്പുകളും പൊലീസ് കണ്ടെടുത്തു. തിങ്കളാഴ്ച രാത്രിയോടെയാണ് സംഘം ബീച്ചിലെ സ്വകാര്യ ഹോട്ടലില് മുറിയെടുത്തത്. വിലയേറിയ പൂച്ചകളെ വില്ക്കുന്നതുമായി ബന്ധപ്പെട്ടാണ് ഇവര് ഹോട്ടലില് മുറിയെടുത്തതെന്ന് പൊലീസ് പറഞ്ഞു.
ഇവരില് അനസിന് വലിയതുറ സ്റ്റേഷനില് മയക്കുമരുന്നുമായി ബന്ധപ്പെട്ട് ഏഴു കേസുകളും മൂന്ന് അടിപിടി കേസുകളുമുണ്ടെന്ന് പൊലീസ് അറിയിച്ചു. കോവളം എസ്എച്ച്ഒ ജി. പ്രൈജു, എസ്ഐമാരായ എസ്. അനീഷ് കുമാര്, വിജയകുമാര് എന്നിവരടങ്ങിയ സംഘമാണ് പ്രതികളെ അറസ്റ്റ് ചെയ്തത്. ഇവരെ കോടതിയില് ഹാജരാക്കി റിമാന്ഡ് ചെയ്തു.