കോഴിക്കോട്: പതിനാറു വയസുകാരിയെ മയക്കുമരുന്ന് നല്കി തട്ടിക്കൊണ്ടുപോയി പീഡിപ്പിച്ചുവെന്ന കേസില് ഒരാള്കൂടി അറസ്റ്റില്.
വിവിധ സംസ്ഥാനങ്ങളിലെ രഹസ്യകേന്ദ്രങ്ങളില് കഴിഞ്ഞ പുറക്കാട്ടിരി സ്വദേശി അരുണ് (27) ആണ് സിറ്റി ക്രൈം സ്ക്വാഡും ഡന്സാഫും നടത്തിയ പരിശോധനയില് അറസ്റ്റിലായത്. വയനാട്ടിലെ രഹസ്യകേന്ദ്രത്തില് കസ്റ്റഡിയിലെടുത്ത പ്രതിയെ ചോദ്യം ചെയ്തശേഷം ടൗണ് അസി. കമീഷണര് പി. ബിജുരാജ് അറസ്റ്റ് ചെയ്തു.
അരുണും പ്രധാനപ്രതി നാസറും മുന്കൂട്ടി പദ്ധതി തയാറാക്കിയശേഷം പെണ്കുട്ടിയെ സംസ്ഥാനത്തിന് പുറത്തേക്ക് കടത്തിക്കൊണ്ടുപോയെന്നാണ് പോലീസ് പറയുന്നത്.16കാരിയെ കര്ണാടകയിലെ ചന്നപട്ടണത്തിനടുത്തുനിന്നാണ് എലത്തൂര് പോലീസ് മോചിപ്പിച്ചത്. മുഖ്യപ്രതി നാസറിനെയും അറസ്റ്റ് ചെയ്തിരുന്നു. ചോദ്യംചെയ്യലിലാണ് സംഘത്തെക്കുറിച്ച് കൂടുതല് വിവരം കിട്ടിയത്.
തലക്കുളത്തൂര് കേന്ദ്രീകരിച്ചുള്ള മയക്കുമരുന്ന് മാഫിയക്കെതിരെ നാട്ടുകാരുടെ പ്രക്ഷോഭം ശക്തമാക്കുന്നതിനിടെയാണ് സംഘത്തിലെ ഒരാള്കൂടി പിടിയിലായത്. ക്രൈം സ്ക്വാഡ് അംഗങ്ങളായ എം. ഷാലു, എ. പ്രശാന്ത്കുമാര്, സി.കെ. സുജിത്ത്, ബിജുമോഹന്, എസ്. ദീപ്തീഷ്, ഡന്സാഫ് അസി. എസ്.ഐ മനോജ് എടയേടത്ത്, സി.പി.ഒമാരായ അര്ജുന്, അജിത്ത് കാരയില്, സുനോജ്, സൈബര് വിദഗ്ധന് പി.കെ. വിമീഷ് എന്നിവരുള്പ്പെട്ടതാണ് അന്വേഷണ സംഘം.
