തിരുവനന്തപുരം: സമുദ്രമാര്ഗം പ്രവാസികളെ നാട്ടിലെത്തിക്കാന് കേന്ദ്ര സര്ക്കാര് തീരുമാനിച്ചാല് തുറമുഖങ്ങള് കേന്ദ്രീകരിച്ചും സജീകരണങ്ങള് ഏര്പ്പെടുത്തുമെന്നു മുഖ്യമന്ത്രി പിണറായി വിജയന്. പ്രവാസികളെ തിരിച്ചുകൊണ്ടുവരാന് കേന്ദ്രം തീരുമാനിച്ചെന്ന സൂചനകള്ക്കിടെയാണു മുഖ്യമന്ത്രിയുടെ പ്രസ്താവന.
കേന്ദ്ര സര്ക്കാര് എപ്പോള് പ്രത്യേക വിമാനം അനുവദിച്ചാലും പ്രവാസികളെ സ്വീകരിക്കാന് സംസ്ഥാനം സജ്ജമാണ്. പ്രവാസികള് തിരിച്ചുവരുന്പോള് സജീകരണങ്ങളും സൗകര്യങ്ങളും ഉറപ്പാക്കുന്നതിനു സെക്രട്ടറിതല സമിതി രൂപീകരിച്ചിട്ടുണ്ട്. പ്രാഥമിക കണക്കനുസരിച്ച് മലപ്പുറം, കോഴിക്കോട്, കണ്ണൂര്, തൃശൂര് ജില്ലകളിലേക്കാണ് കൂടുതല് പേര് എത്തുക. ഓരോ വിമാനത്തിലും വരുന്ന യാത്രക്കാരുടെ വിവരം വിമാനം പുറപ്പെടും മുന്പു തന്നെ ലഭ്യമാക്കണമെന്ന് സിവില് ഏവിയേഷന് മന്ത്രാലയത്തോടും വിദേശകാര്യ മന്ത്രാലയത്തോടും ആവശ്യപ്പെട്ടിട്ടുണ്ടെന്നും മുഖ്യമന്ത്രി അറിയിച്ചു.
കളക്ടര്മാരുടെ നേതൃത്വത്തില് ഓരോ വിമാനത്താവളം കേന്ദ്രീകരിച്ചും പ്രത്യേക കമ്മിറ്റി രൂപീകരിക്കും. എയര്പോര്ട്സ് അതോറിറ്റി ഓഫ് ഇന്ത്യയുടെയും പോലീസിന്റെയും ആരോഗ്യവകുപ്പിന്റെയും പ്രതിനിധികള് ഈ കമ്മിറ്റിയില് ഉണ്ടാകും. പ്രവാസികളെ താമസിപ്പിക്കുന്നതിന് എയര്പോര്ട്ടുകള്ക്ക് സമീപം ആവശ്യമായ സൗകര്യം സര്ക്കാര് ഒരുക്കുന്നുണ്ട്. അതുപോലെ ആശുപത്രികളും ഇപ്പോള് തന്നെ സജ്ജമാണ്.
തിരിച്ചുവരാന് ആഗ്രഹിക്കുന്ന 2.76 ലക്ഷത്തിലധികം പേര് നോര്ക്ക റൂട്ട്സിന്റെ വെബ്സൈറ്റില് രജിസ്റ്റര് ചെയ്തിട്ടുണ്ട്. 150-ല്പരം രാജ്യങ്ങളില് നിന്നുള്ളവര് രജിസ്റ്റര് ചെയ്തിട്ടുണ്ട്. വിവരശേഖരണം സംബന്ധിച്ച ചുമതല നോര്ക്കയ്ക്കാണെന്നും മുഖ്യമന്ത്രി അറിയിച്ചു.