തിരുവനന്തപുരം: ഓഖി ദുരന്തത്തെത്തുടര്ന്ന് കേരളത്തിലുണ്ടായ നഷ്ടം നേരിട്ട് മനസിലാക്കുന്നതിന് സംസ്ഥാനത്തെത്തിയ കേന്ദ്രസംഘം മുഖ്യമന്ത്രി പിണറായി വിജയനുമായി കൂടിക്കാഴ്ച നടത്തി. കേന്ദ്ര ആഭ്യന്തര വകുപ്പിന് കീഴിലുള്ള ദുരന്ത നിവാരണ വിഭാഗം അഡീഷണല് സെക്രട്ടറി ബിപിന് മല്ലിക്, കേന്ദ്ര ഫിഷറീസ് വകുപ്പ് അസിസ്റ്റന്റ് കമ്മീഷണര് ഡോക്ടര് സഞ്ജയ് പാണ്ഡേ എന്നിവര് സെക്രട്ടേറിയറ്റിലെത്തിയാണ് കൂടിക്കാഴ്ച നടത്തിയത്.
മത്സ്യബന്ധന മേഖലയുടെ വികസനത്തിനായി സംസ്ഥാന സര്ക്കാര് ആവിഷ്കരിക്കുന്ന ദീര്ഘകാല പദ്ധതികളെ സംബന്ധിച്ച വിശദാംശങ്ങള് കേന്ദ്രത്തെ അറിയിക്കുമെന്ന് ബിപിന് മല്ലിക് അറിയിച്ചു. തീരമേഖലയില് പ്രവര്ത്തിക്കുന്നതിന് യുവ ഉദ്യോഗസ്ഥരെ ഉള്പ്പെടുത്തി ഒരു ടാസ്ക് ഫോഴ്സ് രൂപീകരിക്കണമെന്ന നിര്ദ്ദേശവും അദ്ദേഹം മുന്നോട്ടുവച്ചു. മത്സ്യത്തൊഴിലാളികളുടെ സമ്ബൂര്ണ വികസനത്തിനായി വിവിധ പദ്ധതികള് സര്ക്കാര് ആവിഷ്കരിച്ചിട്ടുണ്ടെന്ന് കേന്ദ്ര സംഘത്തോട് വ്യക്തമാക്കിയതായും മുഖ്യമന്ത്രി പറഞ്ഞു.
മത്സ്യത്തൊഴിലാളികള്ക്ക് ആധുനിക യാനങ്ങള് ലഭ്യമാക്കുന്നതിനും 600 ചതുരശ്ര അടിയുള്ള മികച്ച ഭവനങ്ങള് ഒരുക്കുന്നതിനും സര്ക്കാര് നടപടി സ്വീകരിച്ചുവരുന്നതായും മുഖ്യമന്ത്രി പറഞ്ഞു. വിവിധ ജില്ലകളിലെ സന്ദര്ശനത്തിന് ശേഷം 29ന് തിരുവനന്തപുരത്ത് തിരിച്ചെത്തുന്ന സംഘം സംസ്ഥാനത്തെ ഉന്നത ഉദ്യോഗസ്ഥരുമായി കൂടിക്കാഴ്ച നടത്തും.