മുംബൈ: അന്തരിച്ച ബോളിവുഡ് താരം ശ്രീദേവിയുടെ മൃതശരീരം അേന്ധരി ലോഖ്ണ്ടാവാലയിലെ സെലിബ്രേഷന്സ് സ്പോര്ട്സ് ക്ലബ് ഗാര്ഡനില് പൊതുദര്ശനത്തിനെത്തിച്ചു. രാവിലെ 9.30ഒാടെയാണ് അന്ധേരിയിലെ വസതിയില് നിന്ന് മൃതദേഹം പൊതുദര്ശനത്തിനായി സ്പോര്ട്സ് ക്ലബിലെത്തിച്ചത്. 12.30 വരെയാണ് പൊതുദര്ശനത്തിനുവെക്കുക. ക്ലബിനുള്ളിലെ ഹാളിനകത്താണ് പൊതുദര്ശനത്തിന് വെച്ചിരിക്കുന്നത്.
ക്ലബിനിനു പുറത്ത് വന്സുരക്ഷയാണ് ഒരുക്കിയിരിക്കുന്നത്. താരത്തിന് അന്ത്യോപചാരമര്പ്പിക്കാന് നിരവധി പ്രമുഖര് എത്തികൊണ്ടിരിക്കുന്നു.
കഴിഞ്ഞ ദിവസം രാത്രി മുതല് ബോളിവുഡ് താരങ്ങളും രാഷ്ട്രീയ സാംസ്കാരിക രംഗത്തെ പ്രമുഖരും ആദരാഞ്ജലി അര്പ്പിക്കാന് അന്ധേരിയിലെ വസതിയില് എത്തിയിരുന്നു.
വൈകീട്ട് മൂന്നരക്കാണ് വിലെപാര്ലെ സേവാസമാജ് ശ്മശാനത്തില് സംസ്കാരം നടക്കുക. ഉച്ചക്ക് രണ്ടോടെ വിലാപയാത്ര ആരംഭിക്കും.
പ്രിയതാരത്തിന് ആദരാഞ്ജലി അര്പ്പിക്കാന് ആയിരങ്ങളാണ് സ്പോര്ട്സ് ക്ലബ് ഗാര്ഡനിനുമുന്നില് തടിച്ചു കൂടിയിരിക്കുന്നത്. അതേസമയം, മാധ്യമപ്രവര്ത്തകരെ കാമറകളുമായി കടത്തിവിടുന്നില്ല. കാമറകള് പുറത്തുവെച്ച് മാധ്യമപ്രവര്ത്തകര്ക്കും അന്തിമോപചാരം അര്പ്പിക്കാമെന്ന് കുടുംബം അറിയിച്ചു. പൊതുദര്ശനത്തിനുശേഷം ഇവിടെ അനുശോചന സമ്മേളനം നടക്കും.
ശനിയാഴ്ച ദുബൈയില് അന്തരിച്ച ശ്രീദേവിയുടെ മൃതദേഹം ഇന്നലെ രാത്രി 9.30 ഒാടെയാണ് മുംബൈ അന്ധേരിയിലെ വീട്ടിലെത്തിച്ചത്. ദുബൈയില് നിന്ന് പ്രത്യേക വിമാനത്തിലാണ് മൃതദേഹം കൊണ്ടുവന്നത്. ഭര്ത്താവ് ബോണി കപൂര്, സഹോദരന് സഞ്ജയ് കപൂര്, അര്ജുന് കപൂര് എന്നിവര് മൃതദേഹത്തെ അനുഗമിച്ചിരുന്നു.
നടപടിക്രമങ്ങള്ക്കൊടുവില് ചൊവ്വാഴ്ച വൈകുന്നേരത്തോടെയാണ് മൃതദേഹം ദുബൈ പൊലീസ് ബന്ധുക്കള്ക്ക് കൈമാറിയത്.