തിരുവനന്തപുരം: ഡിസിപി ചൈത്ര തെരേസ ജോണ് വില കുറഞ്ഞ പബ്ലിസിറ്റിക്കാണ് ശ്രമിച്ചതെന്ന് സിപിഎം സംസ്ഥാന സെക്രട്ടറി കോടിയേരി ബാലകൃഷ്ണന്. സര്ക്കാരിന് മീതെ പറക്കാന് ഉദ്യോഗസ്ഥരെ അനുവദിക്കില്ലെന്നും അദ്ദേഹത്തിന്റെ മുന്നറിയിപ്പ്.
പാര്ട്ടി ഓഫീസില് ഒരു പ്രതിയേയും ഒളിച്ച് താമസിപ്പിച്ചിട്ടില്ല . പാര്ട്ടി ഓഫീസില് നിന്ന് ഒരു പ്രതിയേയും പിടികൂടാന് ഡിസിപിക്ക് കഴിഞ്ഞില്ല. നിയമവാഴ്ച നടപ്പാക്കുന്നതിന് പകരം ഒരു പ്രഹസനം നടത്താനാണ് ഡിസിപി ശ്രമിച്ചതെന്ന് കോടിയേരി ആരോപിച്ചു.
പാര്ട്ടി ഓഫീസില് പൊലീസ് നടത്തിയ പരിശോധന ആസൂത്രിതമാണെന്ന് കരുതുന്നില്ല. ഏതെങ്കിലും ഉദ്യോഗസ്ഥര്ക്ക് ആസൂത്രിതമായി ഇത്തരമൊരു നീക്കം നടത്താനുള്ള സാഹചര്യം ഇപ്പോള് കേരളത്തിലില്ല. എല്ലാ ഉദ്യോഗസ്ഥരും സര്ക്കാരിന് കീഴിലും സര്ക്കാരിന് വിധേയരുമാണെന്നും അദ്ദേഹം പറഞ്ഞു.
തിരുവനന്തപുരം മെഡിക്കല് കോളജ് പൊലീസ് സ്റ്റേഷന് കല്ലെറിഞ്ഞിരുന്നു. ഈ സംഭവത്തില് അമ്ബതോളം ഡിവൈഎഫ്ഐ പ്രവര്ത്തകരെ പ്രതിചേര്ത്ത് പൊലീസ് കേസെടുത്തിട്ടുണ്ട്. പോക്സോ കേസില് അറസ്റ്റിലായ രണ്ട് പ്രവര്ത്തകരെ കാണാന് അനുവദിക്കാതിരുന്നതിനെ തുടര്ന്നായിരുന്നു പ്രതിഷേധം. ഇവരില് ചിലര് സിപിഎം തിരുവനന്തപുരം ജില്ലാ കമ്മിറ്റി ഓഫീസിലുണ്ട് എന്ന വിവരത്തിന്റെ അടിസ്ഥാനത്തിലായിരുന്നു ഡിസിപിയുടെ ചുമതല വഹിച്ച എസ് പി ചൈത്ര തെരേസ ജോണിന്റെ നേതൃത്വത്തില് സിപിഎം ജില്ലാ കമ്മിറ്റി ഓഫീസില് റെയ്ഡ് നടത്തിയിരുന്നത്.