മലപ്പുറം-കോവിഡ് പ്രതിരോധത്തില് വിശ്രമമില്ലാത്തെ ജോലി ചെയ്യുന്ന പോലീസുകാരെ മധുരം നല്കി അനുമോദിച്ച് മലപ്പുറത്ത് ഒരു ലോക്ക്ഡൗണ് കാല കല്യാണം. മലപ്പുറം മൈലപ്പുറം കൊന്നോല കുഞ്ഞിപ്പയുടെ മകള് ഷബാന ഷെറിന്റെയും ഉമ്മത്തൂര് സ്വദേശി നാണത്ത് അബൂബക്കറിന്റെ മകന് മുഹമ്മദ് അര്ഷദിന്റെയും വിവാഹമാണ് ലളിതവും വേറിട്ടതുമായ രീതിയില് നടന്നത്. ലോക്ക്ഡൗണ് നിയന്ത്രണങ്ങളെല്ലാം പാലിച്ചായിരുന്നു വീട്ടുകാര് മാത്രം പങ്കെടുത്ത വിവാഹചടങ്ങ്.
ഇരുവരുടെയും നിക്കാഹ് കഴിഞ്ഞ വര്ഷം ഏപ്രില് 19 ന് നടന്നിരുന്നു. ഈ മാസം ഒമ്പതിന് വിപുലമായ വിവാഹചടങ്ങ് നടത്താനാണ് നേരത്തെ തീരുമാനിച്ചിരുന്നത്. ഇതിനായി ഓഡിറ്റോറിയവും ബുക്ക് ചെയ്തിരുന്നു. എന്നാല് കോവിഡ് വ്യാപനം നിയന്ത്രണത്തിലാവാത്തതിനാല് ലോക്ക്ഡൗണ് നീട്ടിയതോടെ വിപുലമായ ചടങ്ങുകള് ഉപേക്ഷിച്ചു. ഇന്നലെ നിക്കാഹിന്റെ ഒന്നാം വാര്ഷികത്തില് മൈലപ്പുറത്തെ കൊന്നോല വീട്ടിലേക്ക് വീട്ടുകാര് മാത്രം പങ്കെടുത്ത ചടങ്ങില് വിവാഹം നടക്കുകയുമായിരുന്നു. ബിരിയാണി പാര്സലായി നല്കി അയല്വീട്ടുകാരുമായി വിവാഹത്തിന്റെ സന്തോഷം പങ്കിട്ടു. തുടര്ന്ന് വരനും വധുവും മലപ്പുറം പോലീസ് സ്റ്റേഷനിലെത്തി എല്ലാവര്ക്കും ലഡു വിതരണം ചെയ്തു. കോവിഡ് പ്രതിരോധത്തില് വിശ്രമമില്ലാതെ നാളുകളായി പ്രവര്ത്തിക്കുന്ന പോലീസുകാര്ക്കുള്ള ആദരം കൂടിയായാണ് മധുരം നല്കിയതെന്ന് കുഞ്ഞിപ്പ കൊന്നോല പറഞ്ഞു. ദീര്ഘകാലം ജിദ്ദയില് പ്രവാസിയായിരുന്ന കുഞ്ഞാപ്പ ഒമ്പത് വര്ഷം മുമ്പാണ് നാട്ടില് തിരിച്ചെത്തിയത്.