തിരുവനന്തപുരം: പ്രധാനമന്ത്രിയുമായി ഇന്ന് നടക്കുന്ന വീഡിയോ കോണ്ഫറന്സില് സംസ്ഥാനം കൂടുതല് ഇളവുകള് ആവശ്യപ്പെട്ടേക്കും.ലോക്ക് ഡൌണ് നീട്ടേണ്ടതില്ലെന്ന നിലപാടായിരിക്കും സംസ്ഥാനം സ്വീകരിക്കുക. പ്രധാനമന്ത്രി നരേന്ദ്രമോദി മുഖ്യമന്ത്രിമാരുമായി ഉച്ചകഴിഞ്ഞ് മൂന്നിന് വിഡിയോകോണ്ഫറന്സ് വഴി ചര്ച്ച നടത്തും. തീവ്രബാധിത മേഖലകളില് കര്ശന നിയന്ത്രണം തുടരുന്നതിനൊപ്പം ഗ്രീന്, ഓറഞ്ച് സോണുകളില് കൂടുതല് ഇളവ് അനുവദിക്കുന്നത് പരിഗണനയില്.
രോഗവ്യാപനത്തിന്റെ തോത് പരിഗണിച്ച് മേഖലകള് തിരിച്ച് നിയന്ത്രണം ഏര്പ്പെടുത്തിയാല് മതിയെന്നാണ് സംസ്ഥാനത്തിന്റെ അഭിപ്രായം. സംസ്ഥാനത്ത് രോഗവ്യാപനം നിയന്ത്രിക്കാന് കഴിഞ്ഞുവെന്ന വിലയിരുത്തലാണ് സര്ക്കാരിനുള്ളത്. മേയ് പകുതി വരെ ഭാഗിക ലോക്ക് ഡൌണ് വേണമെന്ന നിലപാടായിരുന്നു പ്രധാനമന്ത്രിയുമായി നേരത്തെ നടത്തിയ വീഡിയോ കോണ്ഫറന്സില് സംസ്ഥാനം സ്വീകരിച്ചിരുന്നത്. പൊതു ഗതാഗതം പുനരാരംഭിക്കണമെന്നതടക്കമുള്ള ആവശ്യം മുന്നോട്ട് വച്ചേക്കും. ജനജീവിതം സാധാരണ നിലയിലാക്കാന് വേണ്ടിയുള്ള ഇളവുകള് വേണമെന്നാവശ്യവും സംസ്ഥാനം മുന്നോട്ട് വയ്ക്കും. സാഹചര്യം പരിഗണിച്ച് കൂടുതല് ഇളവുകള് നല്കുന്ന കാര്യത്തില് സംസ്ഥാന സര്ക്കാരിന് കൂടുതല് അധികാരം നല്കണമെന്നാവശ്യവും കേരളം മുന്നോട്ട് വച്ചേക്കും.
പ്രധാനമന്ത്രി മുഖ്യമന്ത്രിമാരുമായി നടത്തുന്ന അഞ്ചാമത്തെ വീഡിയോ കോണ്ഫറന്സാണ്. മൂന്നാംഘട്ട ലോക് ഡൗണ് മേയ് 17ന് അവസാനിക്കും. ഏപ്രില് 27ന് 4-ാമത് കോണ്ഫറന്സ് നടക്കുമ്ബോള് രാജ്യത്ത് കോവിഡ് സ്ഥിരീകരിച്ചവരുടെ എണ്ണം 28,380 ആയിരുന്നു. ഇപ്പോള് അറുപത്തി രണ്ടായിരം കടന്നിരിക്കുന്നു. മരണസംഖ്യ രണ്ടായിരത്തിലധികമായി. രാജ്യമാകെ ഒരേ സ്വഭാവത്തില് ലോക്ഡൗണ് തുടരാന് കഴിയില്ലെന്നാണ് സര്ക്കാരിന് മുന്നിലുള്ള നിര്ദേശം. സാമ്ബത്തിക മേഖലയ്ക്ക് ഉണര്വേകും വിധത്തില് ഇളവുകള് വേണമെന്ന് ചീഫ് സെക്രട്ടറിമാര് കാബിനറ്റ് സെക്രട്ടറിയെ ഇന്നലെ അറിയിച്ചിട്ടുണ്ട്.