കൊച്ചി: സ്വര്ണ്ണക്കടത്ത് കേസില് എന്ഫോഴ്സ്മെന്റ് ഡയറക്ടറേറ്റ് (ഇഡി) ഉദ്യോഗസ്ഥര്ക്കെതിരേയുള്ള ജുഡീഷ്യല് അന്വേഷണം സ്റ്റേ ചെയ്ത് ഹൈക്കോടതി ഇടക്കാല ഉത്തരവിറക്കി.
ജുഡീഷ്യല് അന്വേഷണത്തിന് ഉത്തരവിട്ട സര്ക്കാര് തീരുമാനത്തെ ചോദ്യം ചെയ്തുള്ള ഇഡിയുടെ ഹര്ജിയിലാണ് സിംഗിള് ബെഞ്ചിന്റെ ഇടക്കാല ഉത്തരവ്. ജുഡീഷ്യല് അന്വേഷണത്തിനെതിരായ ഹര്ജി കോടതി ഫയലില് സ്വീകരിച്ചു. കേസില് ചീഫ് സെക്രട്ടറി ഉള്പ്പെടെയുള്ള എതിര്കക്ഷികള്ക്ക് നോട്ടീസ് അയക്കും. ഇതിനുശേഷം കോടതി വിശദമായ വാദം കേള്ക്കും.
കേന്ദ്ര ഏജന്സിക്കെതിരേ ജുഡീഷ്യല് കമ്മീഷനെ നിയമിക്കാന് സംസ്ഥാന സര്ക്കാരിന് അധികാരമില്ലെന്ന് ഹര്ജിയില് ഇഡി ചൂണ്ടിക്കാട്ടിയിരുന്നു. സ്വര്ണക്കടത്തിലെ അന്വേഷണം അട്ടിമറിക്കാനാണ് ജുഡീഷ്യല് കമ്മീഷനെ നിയമിച്ചതെന്നും മുഖ്യമന്ത്രി ഔദ്യോഗിക പദവി ദുരുപയോഗം ചെയ്താണ് കമ്മീഷനെ നിയോഗിച്ച് ഉത്തരവിറക്കിയതെന്നും ഇഡി ആരോപിച്ചിരുന്നു. എന്നാല് ജുഡീഷ്യല് കമ്മീഷനെതിരായ ഇഡിയുടെ ഹര്ജി നിലനില്ക്കില്ലെന്നായിരുന്നു സര്ക്കാര് വാദം. ഇതുതള്ളിയാണ് കോടതി ഇടക്കാല ഉത്തരവിറക്കിയത്.