തിരുവനന്തപുരം: തുടര്ച്ചയായ പ്രതിഷേധങ്ങളുടെ പശ്ചാത്തലത്തില് മുഖ്യമന്ത്രി പിണറായി വിജയന്റെ സുരക്ഷ ശക്തമാക്കാന് പൊലീസ്. മുഖ്യമന്ത്റി പങ്കെടുക്കുന്ന പൊതു പരിപാടികളിലും യാത്രകളിലും 200 മീറ്റര് അകലത്തില് പൊതുജനങ്ങളെ മാറ്റി നിറുത്തുന്ന സുരക്ഷാ ക്രമീകരണമാണ് പൊലീസ് ഒരുക്കുന്നത്. വി.വി.ഐ.പികളുടേതു പോലെ മുഖ്യമന്ത്രിയുടെ വാഹനവ്യൂഹം കടന്നുപോവുമ്ബോള് ചെറു റോഡുകള് അടയ്ക്കണമെന്നും ശുപാര്ശയുണ്ട്. നിലവില് ഇസഡ് കാറ്റഗറി സുരക്ഷയാണ് മുഖ്യമന്ത്രിക്ക് നല്കുന്നത്. എപ്പോഴും 28 കമാന്ഡോകളാകും സുരക്ഷയൊരുക്കുക.
ശബരിമല യുവതീ പ്രവേശനവുമായി ബന്ധപ്പെട്ട് മുഖ്യമന്ത്റിക്ക് സുരക്ഷാ ഭീഷണിയുണ്ടെന്ന വിലയിരുത്തലിന്റെ അടിസ്ഥാനത്തിലാണ് സുരക്ഷ കൂട്ടുന്നത്. ഇപ്പോള് മുഖ്യമന്ത്റി പോകുന്ന വഴികളില് മറ്റു വാഹനങ്ങള് തടയുന്നുണ്ട്. വാഹനവ്യൂഹത്തിലെ പൊലീസ് വാഹനങ്ങളുടെയും സുരക്ഷാചുമതലയുള്ള പൊലീസുകാരുടെയും എണ്ണം കൂട്ടണമെന്നും ശുപാര്ശയുണ്ട്. മുന് മുഖ്യമന്ത്റി ഉമ്മന്ചാണ്ടിക്ക് ഇസഡ് കാറ്റഗറി സുരക്ഷ ശുപാര്ശ ചെയ്തിരുന്നെങ്കിലും ജനങ്ങളുടെ ബുദ്ധിമുട്ട് പരിഗണിച്ച് ഒഴിവാക്കാന് അദ്ദേഹം നിര്ദ്ദേശിച്ചിരുന്നു. കണ്ണൂരിലെ പൊതു പരിപാടിക്കിടയില് ഉമ്മന്ചാണ്ടിക്കു നേരെ കല്ലേറുണ്ടാകുകയും അദ്ദേഹത്തിന് പരിക്കേല്ക്കുകയും ചെയ്തിരുന്നു.
കഴിഞ്ഞ ദിവസം മുഖ്യമന്ത്റിയെ കരിങ്കൊടി കാട്ടാന് ശ്രമിച്ച കോണ്ഗ്രസ് നേതാക്കളെ വാഹനവ്യൂഹം ഇടിച്ചു വീഴ്ത്തിയതും സെക്രട്ടേറിയറ്റിലെ മുഖ്യമന്ത്റിയുടെ ഓഫീസിനടുത്തു വരെ മഹിളാമോര്ച്ച നേതാക്കളെത്തി പ്രതിഷേധിച്ചതും സുരക്ഷാ വീഴ്ചയാണെന്നാണ് പൊലീസിന്റെ വിലയിരുത്തല്.